Die volledige geskiedenis van ’n dosyn van Durbanville Hills se wyne sal binnekort op die internet opgespoor kan word. Dít volg nadat die Suid-Afrikaanse wynbedryf se etiese seël aan 12 van dié wynmakery se wyne toegeken is.

Luidens ’n verklaring is dit die meeste wyne by een wynlandgoed wat die seël ontvang het. Dit kan gesien word op wyn wat aan ’n streng oudit onderwerp is om te bepaal dat tydens die maak daarvan, die kode vir billike arbeidspraktyke toegepas is. Die kode word deur die Vereniging vir Etiese Handel in die Wyn- en Landboubedryf (WIETA) bepaal.

’n Unieke nommer word op elke seël aangebring, wat die verbruiker in staat stel om die geskiedenis van die wyn op die internet na te gaan.

Klein netwerk
Me. Deidré Samson, die landgoed se internasionale bemarkingsbestuurder, sê so baie van hul wyne het die seël ontvang, omdat hulle ’n klein netwerk van lede het wat as ’n hegte groep saamwerk ­– “wat aan dieselfde progressiewe beginsels rakende indiensnemingspraktyke glo”.

Die seël se ontwerp is gebaseer op die land se volhoubaarheidseël wat ontwikkel is om bewustheid te skep rakende produksie-integriteit tydens elke stadium van die voorsieningsketting van die wingerd tot by die bottel.