Meeste produsente is bekend met die Kaliforniese mastitistoets, of, soos meer algemeen bekende, die CMT-toets waar klein hoeveelhede melk in 'n spesiale bakkie gegooi word, 'n reagens bygevoeg word en die reaksie wat dan plaasvind 'n aanduiding kan gee van die graad van mastitis in die verskillende kwarte. Hierdie toets kan egter ook direk ná kalwing gebruik word om pasgekalfte koeie vir subkliniese mastitis te ondersoek.

Die CMT kan ook op die melk van pas gekalfte koeie gebruik word. Kolostrum wat gewoonlik meer dig as varsmelk is het nie 'n negatiewe effek op die CMT toets nie - die reaksie met die CMT word bepaal deur die seltelling en nie deur die digtheid van die melk nie.

Die uitdaging lê daarin om die CMT-resultate te interpreteer. 'n Kenmerkende verdikking van die melk word waargeneem in koeie later in laktasie met subkliniese mastitis en dit sal verskil as dit vergelyk word met koeie wat pas gekalf het.

Om eenvormige toetsresultate te verseker moet alle bestuurders en persone verantwoordelik vir CMT korrek opgelei word - u kuddeveearts kan hier leiding neem.

Hierdie eenvoudige prosedure kan in 'n paar minute gedoen word en behoort deel uit te maak van die roetine ná-kalwingsbestuur. Daar sal kortliks na die riglyne vir hierdie prosedure verwys word - u kuddeveearts sal u verder kan help.