Landbou
LBW en Sanlam se Landbouvroue-entrepreneur 2007:
Gewilde kompetisie begin


Inskrywings vir Landbouweekblad/Sanlam se derde Landbouvroue-entrepreneurskompetisie word ingewag. Die aanloklike prys van R60 000 wink weer vir die wenner.

Vanjaar word die net wyer uitgegooi deurdat enige vrou wat 'n onderneming op erkende landbougrond bedryf, genooi word om haarself in te skryf. Voorheen is net boervroue wat hul eie besigheid bedryf, oorweeg.

As jy dus 'n onderneming op landbougrond bedryf, vyftig persent of meer van dié onderneming besit en 'n omset van minstens R3 000 per maand daarmee genereer, voldoen jy aan die vereistes om deel te neem. Kyk gerus na die volledige kriteria vir dié kompetisie wat hierby verskyn.

Vroue huiwer steeds om in te skryf omdat dikwels gemeen word dat hul ondernemings - gemeet aan ander inskrywings - te klein is. As jy ook só oor jou besigheid voel, kyk gerus met nuwe oë na die kriteria. Hier word nie op die grootste omset gefokus nie, maar liefs op die identifisering van 'n geleentheid, struikelblokke wat oorkom is en die inspirasie wat 'n onderneming bied waardeur andere aangemoedig word om dieselfde te doen.

Enigiemand wat 'n voorvat-vrou ken wat só 'n onderneming bedryf, kan haar vir die kompetisie inskryf.

Vanjaar se kompetisie duur van 6 Julie tot 30 September 2007. Artikels oor vroue wat inskryf, word egter tot 30 November 2007 gepubliseer.

Ses finaliste word op 12 Desember deur 'n paneel beoordelaars uit al die inskrywings gekies. Dié mense sal elk R5 000 en ander pryse van meer as R2 000 ontvang.

Dié vorm is ook beskikbaar op Sanlam se webwerf by www.sanlam.co.za. Stuur jou vorm elektronies na lvstad@landbou.com, per slakkepos vóór 30 September 2007 aan: Landbouweekblad/Sanlam Landbouvroue- entrepreneurskompetisie, Posbus 1802, Kaapstad 8000 of faks dit alternatiewelik vir aandag: Linda van Staaden, 021 406 2940.

Klik hier om die vorm (in PDF-formaat) af te laai.

Wie mag inskryf?

  • Enige vrou wat op verklaarde landbougrond 'n onbenutte geleentheid raakgesien het en dit gebruik om 'n lewensvatbare en volhoubare bedryf te skep.
  • Dié bedryf moes by die aanvang daarvan op die genoemde landbougrond ontstaan het as sekondêre bedryf tot die boerdery.
  • Sy moet die meerderheidsaandeel (50 % of meer) in die bedryf besit.
  • Haar entrepreneurskap - en dít wat sy bereik het - moet kan dien as inspirasie vir ander vroue in dieselfde omstandighede om dieselfde te doen.

    Reëls
    1. Benoemings

  • Buiten om haarself te benoem, mag 'n vrou ook deur organisasies of ander individue benoem word indien sy haar toestemming daartoe gegee het.
  • Inskrywings is gratis.
  • Werknemers van Media24 en Sanlam of hul filiale mag nie aan die kompetisie deelneem nie. Dit geld ook die gesins- en familielede van die werknemers van hierdie maatskappye.

    2. Kwessies betreffende inligting wat voorsien is

  • Benoemdes verklaar dat alle aansprake wat in die voorsiende inligting gemaak word, feitelik korrek is. Indien gevind word dat die inligting vals of opsetlik misleidend is, sal die betrokke benoemde gediskwalifiseer word.
  • Alle inligting wat voorsien word, moet in Afrikaans aangebied word.
  • Erkenning sal slegs gegee word aan volledige inskrywings wat Landbouweekblad voor die sperdatum (30 September 2007) bereik. Laat inskrywings (wat ná 30 September 2007 onvang word) sal nie in aanmerking geneem word nie. Die organiseerders van die kompetisie aanvaar geen aanspreeklikheid vir posvertragings of vir inskrywings wat in die pos of die elektroniese media verlore mag raak nie.
  • Landbouweekblad aanvaar dat die inligting wat 'n deelnemer oor haar onderneming verskaf na die tydskrif se goeddunke geredigeer en gepubliseer mag word, maar aanvaar geen aanspreeklikheid indien enige aanspraak of feite wat deur die inskrywer verskaf is, deur 'n ander party betwis of bevraagteken sou word nie.
  • Vertroulike inligting wat van deelnemers ontvang word, sal as sulks gehanteer word.
  • Geen materiaal wat vir inskrywingsdoeleindes ingestuur is, sal aan die sender teruggestuur word nie.

    3. Inligting benodig
    Aanvullende inligting moet ingedien word as 'n dokument wat die volgende bevat:
    'n Skutblad (indien apart van inskrywingsvorm ingedien word) bevattende:

  • Die benoemde se volle name, geboortedatum, e-posadres, werks- en selfoonnommer.
  • Die benoemer se naam, titel, werksplek, eposadres, telefoon- en selfoonnommer.
  • 'n Beskrywing van een paragraaf van die benoemde se onderneming.
  • Jaarlikse omset van besigheid.
  • Hoeveelheid mense in diens.
  • Entrepreneur se maandelikse inkomste uit besigheid.

    4. Die beoordelingsproses
    Die wenner sal deur 'n onafhanklike paneel beoordelaars aangewys word. Die besluit is finaal en geen korrespondensie sal gevoer word ná die wenner aangekondig is nie.

    Die beoordelaars se beslissing van die ses finaliste, asook dié van die finale wenner, is finaal en geen korrespondensie sal hieroor gevoer word nie.

    5. Kontakbesonderhede
    Alle inskrywings kan gerig word vir aandag Linda van Staaden.
    Posadres: Landbouvroue-entrepreneurskompetsie, Landbouweekblad, Posbus 1802, Kaapstad 8000
    E-posadres: lvstad@landbou.com
    Faksnommer: 021 406 2940
    Telefoonnavrae: 021 406 2296

    6. Belangrike datums
    Die kompetisie sluit op 30 September 2007.
    Geen laat inskrywings sal in aanmerking kom nie.

  • Ses finaliste word op Woensdag, 12 Desember 2007, uit al die inskrywings gekies.
  • Die beoordelaars lê tussen 17 en 25 Januarie 2008 by die onderskeie ondernemings van die ses finaliste besoek af voordat 'n wenner aangewys word.

    4 Julie 2007