Aartappelprentjie donker

Aartappelpryse daal en kan binnekort selfs minder as boere se produksiekoste wees. Boonop lyk die vooruitsig vir hoër pryse nie rooskleurig nie weens die gevaar van oorproduksie.

Dr. Niël Theron, hoof uitvoerende beampte van Aartappels Suid-Afrika (ASA), vermaan produsente en voornemende produsente ernstig om vroegtydig ASA se streekkantore te nader om op die hoogte van die jongste neigings te kom voor hulle groter of eerste aanplantings oorweeg.

Aartappelpryse het sedert April vanjaar drasties gedaal weens groter volumes vanuit die Oos-Vrystaat en Mpumalanga. Dié streke se oeste is nie so erg deur die droogte geknou nie. Boonop het laat reën hierdie oeste se bemarkingstyd verleng en dit net meer met die Wes- en Suidwes-Vrystaat se groter oeste en Limpopo se vroeë oes laat oorvleuel.

Die gemiddelde weeklikse verkope het van 1,4 miljoen sakkies van Januarie tot April tot 1,9 miljoen sakkies van Mei tot Augustus gestyg en pryse het van R20 tot R11 per sakkie gedaal.

In September en Oktober het pryse effens gestyg weens 'n kleiner aanbod, maar daal nou weer en kan tot einde vanjaar onder druk bly.

Theron sê die oppervlakte wat vir bemarking van Desember vanjaar tot Januarie volgende jaar beplant word, verskil nie veel van vanjaar se aanplantings nie. Goeie reën en gevolglike hoër opbrengste kan die markpryse selfs tot onder produksiekoste laat daal.

In die verlede het swakker graanpryse, veral dié van mielies en koring, sommige boere na aartappelverbouing laat oorskakel. Die feit dat graanpryse wéér onder groot druk is, kan boere weer noop om alternatiewe gewasse te plant, waarvan aartappels een is. As dit gebeur, sal dit beslis bykomende druk op die aartappelprys plaas.

3 Desember 2004