Agri SA help Zim-boere

Agri SA het by sy jaarkongres besluit om sy eweknie in Zimbabwe, die Commercial Farmers' Union (CFU), met individuele skenkings en diesel vir 'n kragopwekker by te staan.

Die CFU vind dit moeilik om sy werk voort te sit weens gereelde kragonderbrekings. Nadat Agri SA reeds voorheen 'n kragopwekker aan die organisasie geskenk het, het die Landboubesigheidskamer (LBK) nou onderneem om die CFU vir 'n jaar lank van minstens 1 000 liter diesel per maand te voorsien.

Daar is ook 'n beroep op Agri SA lede gedoen vir geldelike skenkings. Graan SA het aangekondig dat hy, benewens individuele boere se skenkings, ook R5 000 aan die CFU beskikbaar stel.

Twee bekende boere, mnre. Pieter Erasmus van Middelburg (Oos-Kaap) en Jan van den Bergh van Ladybrand het ook aangekondig dat hulle elk R5 000 bewillig. Mnr. Trevor Gifford, voorsitter van die CFU, het gesê sedert die politieke ooreenkoms in Zimbabwe gaan dit eerder slegter as beter met die oorblywende boere.

Plase word steeds beset en dit wil voorkom of grondbesetters nog op die laaste plase beslag probeer lê voor daar 'n regering van nasionale eenheid in plek is.

Skenkings vir die CFU kan gaan aan:
Agri Info (EDMS Bpk), Absa, rekening no. 405 056 6323.

13 Oktober 2008