Bakkers in kommissie se visier

Die land se voorste bakkerye word van kartelvorming beskuldig deurdat hulle glo die broodprys gelyktydig in die Wes-Kaap verhoog het.

Volgens 'n verklaring van die Mededingingskommissie sal hy Pioneer Foods, met die handelsname Sasko en Duens Bakeries, en Tiger Food Brands, met die handelsnaam Albany Bakeries, voor die Mededingingstribunaal vervolg.

'n Derde bakkery, Premier Foods, met die handelsnaam Blue Ribbon Bakery, word ook van samespanning aangekla. Dié maatskappy kan egter moontlik vervolging ontglip.

Volgens mnr. Tembinkosi Bonakele, hoof van voldoening by die kommissie, het Premier Foods ten tyde van die ondersoek aansoek gedoen om korporatiewe toegeeflikheid. Dit beteken Premier kan vervolging vryspring as hy die kommissie se ondersoekspan van voldoende inligting voorsien wat tot die suksesvolle vervolging van die ander twee maatskappye lei.

"Premier Foods het bevestig die twee maatskappye (Pioneer en Tiger Food) Kaap het verskeie vergaderings gehad en inligting uitgeruil oor die prys van brood en die afslag aan onafhanklike verspreiders betaalbaar," het Bonakele gesê.

Die kommissie se ondersoek is in Desember van stapel gestuur nadat hy verskeie telefoonoproepe ontvang het met beskuldigings teen die bakkerye. Die bewerings sluit in:

Die gelyktydige styging in die broodprys aan onafhanklike verspreiders in die Wes-Kaap met 30c tot 35c per brood.

Die gelyktydige daling en vasstelling van afslag wat aan onafhanklike verspreiders gegee word tot 'n maksimum van 75c per brood, ongeag hoeveel gekoop word.

Die ooreenkoms tussen die bakkerye om glo nie mekaar se verspreiders van brood te voorsien nie.

Bonakele sê hoewel dié saak op die Wes-Kaap fokus, is 'n nasionale ondersoek reeds aan die gang. Dit volg nadat die kommissie inligting oor moontlike kartelvorming onder bakkerye in ander dele van die land ontvang het.

Die kommissie sê hy is vasbeslote om die bakkerye so gou moontlik voor die tribunaal te vervolg omdat samespanning armer verbruikers benadeel.

Landbouweekblad, 23 Februarie 2007