Belowendste kanola-oes in 18 jaar

Kanola-lande naby Heidelberg. Foto: ALANI JANEKE

Graanboere verwag dat die kanola-oes in die Suid-Kaap, wat tans op die lande is, die beste in 18 jaar sal wees.

Mnr. Andries Theron, voorsitter van Graan SA se wintergraankomitee, sê ‘n gemiddelde oes word vir die Wes-Kaap verwag, veral omdat die aanplantings later as gewoonlik plaasgevind het.

“Ons is egter baie opgewonde oor die moontlike opbrengs. Veral die beter kultivars wat aangeplant is dra by tot ‘n beter as verwagte oes. Ons is regtig baie opgewonde want die aanplantings wys tans baie potensiaal,” vertel Theron.

Wat koring-aanplantings betref, sê Theron is boere net so vol verwagting. “Vir die eerste keer in baie jare is daar nie een gebied in Suid-Afrika waar die boere nié opgewonde is oor die koring op die land nie. Van die Oos-Vrystaat, tot die Loskopdam-besproeiingsgebied en tot in die Swartland.”

Kostestygings tot 44%
Theron sê dié opgewondenheid word tog effens oorskadu deur kostestygings wat die bedryf die jaar weer getref het. Volgens Theron het insetkoste vir die totale bedryf vanjaar met tot 22% gestyg. Hy sê van die kunsmispryse het met tot 22% gestyg. Jaar-op-jaar het die koste van brandstof met 25% gestyg, terwyl die koste van stikstof in sommige dele met tot 44% verhoog het.

“Dié koste kom te midde van pryse wat sywaarts beweeg het die jaar. Ons is steeds baie dankbaar vir die goeie oeste wat nou op die lande is, maar boere is maar bekommerd oor die kostestygings,” vertel Theron.

‘n Groot deel van die jaar se koring is later as gewoonlik aangeplant weens die nat toestande wat aan die einde van Julie en aan die begin van Augustus ervaar is.

23 Augustus 2011