Suider-Afrika kry katoenvereniging

Beter koördinering is nodig in die katoenbedryf. Foto: NICO VAN BURICK

In ’n poging om die katoenbedryf van Suider-Afrika te bevorder, is ’n vereniging vir die bedryf in dié streek gestig, aldus die Suider-Afrikaanse Konfederasie van Landbou-unies (Sacau).

Luidens ’n verklaring het afgevaardigdes van Suid-Afrika, Malawi, Mosambiek, Zambië, Madagaskar, Swaziland, Tanzanië en Zimbabwe die stigtingsdokument verlede week in Pretoria onderteken.

Die organisasie sal as die Suider-Afrika Katoenprodusente-vereniging bekend staan.  Die afgevaardigdes sê hulle het besef beter koördinering en samewerking is op ’n streeksvlak nodig vir die bedryf om vorentoe te beweeg.

“Ons uiteindelike doel sal wees om ’n winsgewende en volhoubare katoensektor te ontwikkel wat tot die welstand van katoenboere en die algemene ekonomiese ontwikkeling van die streek sal bydra,” lui die verklaring.

Sleuteldoelwitte
Van die sleuteldoelwitte wat die organisasie sal nastreef, is om die produktiwiteit van die bedryf te verbeter, asook om die produksie van hoëgehalte-katoen te verhoog.

Hy beoog ook om solidariteit tussen ledeverenigings te bevorder en om die ontwikkeling van strategiese vennootskappe tussen katoenverenigings en die publiek te help bewerkstellig.

Luidens die verklaring onderneem die vereniging dat die stigtingproses teen Augustus aanstaande jaar voltooi sal wees. Intussen sal ’n waarnemende komitee ’n grondwet opstel, strategiese mobilisering en die implementering van die sleuteldoelwitte hanteer.

Dié komitee is saamgestel uit afgevaardigdes van Katoen SA, die Katoenvereniging van Zambië, die Zimbawiese Katoenprodusente-organisasie en die sekreteriaat van Sacau.

31 Augustus 2011