Onkruid knou koringproduksie

Koring kan weerstandigheid teen onkruiddoders ontwikkel.

Probleme met weerstand teen onkruiddoders het die koringbedryf in die Wes-Kaap geknou, sê Graan SA.

Mnr. Andries Theron, voorsitter van die organisasie se wintergrane-werkgroep, sê ryegras is een van die groot probleemonkruide in die provinsie. Die voorkoms van breëblaaronkruide neem ook toe.

“In sekere gebiede in die Swartland, soos Riebeek-Kasteel en Malmesbury, het dié neiging daartoe gelei dat boere opgehou het om koring te plant. Baie van hulle plant nou eerder kanola,” verduidelik Theron.

Volgens Theron moet ’n oplossing vir die situaie gesoek word aangesien dit ’n beduidende invloed op koringproduksie en gevolglik voedselsekerheid gaan kan hê.

Wisselbou is die antwoord
Theron meen dat een van die beste bestrydingsoplossings die deeglike bestuur van ’n stelsel is waarin twee gewasse geroteer word. “Uit die jongste oesskatting lyk dit gelukkig of boere geneë is met die rotasiestelsel en daarby volstaan.”

Volgens Theron is wisselbou veral voordelig omdat dit die boer in staat stel om ’n wyer reeks chemiese produkte te gebruik om onkruid te bestry.

Intussen sê prof. Charlie Reinhardt, ’n buitengewone professor van die departement van plantproduksie en grondkunde aan die Universiteit van Pretoria, nog ’n oplossing is meganiese bewerking.

Hy sê die feit dat minder bewerking in verskeie dele van die land voorkom, kon gelei het tot die toename in die weerstand teen onkruiddoders. Lees meer hier.

Wat die beperking van ryegras betref, is die situasie in die Wes-Kaap nog nie gewens nie. “Ons sal baie vinnig moet kyk na oplossings, soos die regte kultivars, soos in die geval van kanola,” aldus Theron.

30 Augustus 2011