SA help teen stamroes

Suid-Afrika is gereed om die stamroes wat tans in Sentraal-Afrika voorkom, die hoof te bied as dié siekte suidwaarts versprei.

Die land se koringbedryf is veral op 'n streekgrondslag betrokke om nuwe koringkultivars met volhoubare weerstandigheid gereed te hê sou die siekte hier uitbreek, sê 'n span kenners wat onlangs die landbou-navorsingsinstituut van Kenia besoek het.

Hul besoek was onder meer daarop gemik om Suid-Afrikaanse kultivars en kiemplasma te evalueer vir weerstandigheid teen die nuwe stamroes as dit suidwaarts versprei.

Dit is die tweede jaar dat die Suid-Afrikaanse wetenskaplikes saam met die internasionale groep hul mees gevorderde kiemplasma by Nakuru in Kenia beproef. Altesame 13 000 koring- en garslyne van 22 lande word onder veldtoestande vir weerstandigheid teen die geslag nuwe stamroes getoets.

Volgens prof. Sakkie Pretorius van Universiteit van die Vrystaat, dr. Cobus le Roux, mnre. Krishna Naicker en Lukas Meyer, almal van die Landbounavorsingsraad (LNR) se Instituut vir Kleingraangewasse (KGI) op Bethlehem, speel Suid-Afrika 'n belangrike rol in die internasionale beweging teen stamroes om die bedreiging van dié siekte die hoof te bied.

Die siekte kan 'n katastrofiese uitwerking op koringoeste hê, afhangende van die weer en die vatbaarheid van die oes. Die stamroespatogeen was egter die afgelope twee dekades geneties goed in bedwang danksy die toegewyde koringteelt van die verlede.

16 Oktober 2007