Mielie-etanol: ‘Tree nóú op’

Mielies. Foto: CHARL VAN ROOYEN

Suid-Afrika se boere het gewys hulle kan blywend ’n mielie-oorskot produseer.

Daarom is dit ’n wanindruk dat ’n plaaslike biobrandstofbedryf weghol-inflasie in voedselpryse kan meebring, sê dr. Kobus Laubscher, hoofbestuurder van Graan SA.

Suid-Afrikaanse boere het sedert 1994 nog nie een seisoen te min wit mielies vir binnelandse verbruik geproduseer nie, het Laubscher op ’n streekvergadering van Graan SA in Wolmaransstad gesê. “Politici se vrese (oor biobrandstof uit mielies) is ongegrond.”

Dié vrese is nogtans verstaanbaar omdat dit ’n verkiesingsjaar vir Suid-Afrikaners is en “verkiesings oor die prys van kos verloor word”, het hy gesê.

Daar moet egter in gedagte gehou word dat die ru-olieprys opnuut styg en dat dit biobrandstof opnuut ’n opsie maak om te oorweeg.

Hy het vir groter “vlugvoetigheid” binne die burokrasie gevra. “Die Zuma-regering se styl van besluitneming wat vereis dat departemente mekaar eers raadpleeg voor ’n besluit (ook oor mielie-etanol) geneem word, moet verwelkom word.

Dit verg egter beter koördinasie tussen alle betrokke departemente en ongelukkig staan die Departement van Landbou, Bosbou en Visserye heel agter in die tou,” het Laubscher gesê.

Lees meer in Landbouweekblad se uitgawe van 4 Februarie 2011.

31 Januarie 2011