’n Uitdaging is aan mnr. Nono Maloyi, LUR vir Menslike Nedersettings, Openbare Veiligheid en Skakeling, gerig om die name van landbouprodusente wat hulle aan moorde en mishandeling van plaaswerkers skuldig maak, bekend te maak.

Agri Noordwes sê Maloyi maak die stelling dat baie gevalle voorkom waar boere plaaswerkers mishandel, of vermoor, maar dat dit nie aangemeld word nie.
 
Mnr. Flip le Roux, onder-voorsitter, sê luidens ’n verklaring Maloyi se oningeligte en bevooroordelende uitsprake is onverantwoordelik en aanvegbaar. Die LUR het glo ook na die Cloete-voorval verwys waar die dood van ’n plaaswerker ondersoek word.

Hy het in dié verband gevra vir swaarder strawwe sodat ’n duidelike boodskap gestuur kan word aan “boere wat voortgaan om onskuldige plaaswerkers te mishandel”.
 
Lees meer oor die Cloete voorval hier.

Plaasmoorde
Le Roux sê hulle wil graag van die LUR weet hoekom boere nie dieselfde reaksie van hom af kry wanneer plaasmoorde in die provinsie plaasvind nie. “Elke landbouprodusent in die provinsie is net so ’n burger van die land as enige plaaswerker en is geregtig op dieselfde regte en beskerming in ooreenstemming met die Grondwet.”
 
Die staat word ook gekritiseer vir die afwesigheid van provinsiale departemente by ’n vergadering oor die inwerkingstelling van die Landelike Veiligheid-strategie. Le Roux sê die polisie het verteenwoordigers van sy hoofkantoor gestuur om inligting beskikbaar te maak, maar Maloyi se departement asook die provinsiale departement van landbou was afwesig.
 
“Hierdie optrede van provinsiale departemente spreek van ’n ongeërgde, ongedissiplineerde houding waar daar duidelik nie werklik erns is met veiligheidsvraagstukke in die landelike gebiede nie,” aldus Le Roux.