Arbeid: Gedragskode vir plase

Plaaswerkershuis. Foto: ERIKA FOURIE

‘n Arbeidsgedragskode vir plase, waartoe Agri SA en sy lidorganisasies hulself verbind, is Vrydag (3 Desember) vrygestel.

Luidens ‘n verklaring stel dié kode goeie arbeidspraktyke op plase as ‘n vereiste.

“Ons vertrou dat dié dokument deur alle partye aanvaar sal word as kommersiële landbouers se verbintenis tot ‘n arbeidsbedeling, wat goeie verhoudinge sal bevorder en ontwikkeling op ‘n breë basis sal ondersteun,” sê mnr. Anton Rabe, voorsitter van Agri SA se arbeid- en sosiaal-maatskaplike beleidskomitee.

Veralgemenings
Rabe sê die dokument is in die vorm van ‘n verklaring van voorneme opgestel, wat die verskeie uitgangspunte van die Agri SA-beleidsdokumente - wat sedert 2001 op sy kongresse bespreek en aanvaar is – herbevestig.

“Ons vertrou dat die dokument eens en vir altyd eensydige en veralgemeende blamering van kommersiële boere vir alles wat sleg en verkeerd is, in die regte perspektief sal plaas.  Ons verbind ons hiermee by herhaling tot gedissiplineerde optrede in die algemeen en tot die oplossing van spesifieke probleme waar dit ook al mag voorkom,” aldus Rabe.

Die besluite
Die verklaring verwoord die organisasie se 2010-kongresbesluite en voorneme tot gehalte lewens- en werksomstandighede op plase binne die konteks van landelike ontwikkeling.

Dit fokus onder meer op die toepassing van arbeidswetgewing, die hantering van onbillike diskriminasie, mishandeling van werkers, toegang tot plase, veiligheid in die werkplek, elemente van verblyfsekerheid en die toegang tot grafte op plase. Bemagtiging en opleiding, toegang tot gesondheids- en welsynsdienste, ontspanning en sportfasiliteite is ook in die dokument vervat.

Die minister?
Intussen sê me. Elize van der Westhuizen, Agri SA se menslike hulpbronnebestuurder, die verklaring is ook aan me. Milderd Oliphant, die Minister van Arbeid gestuur. “ ’n Brief waarin ons die verklaring verduidelik en haar ook weer eens vra vir ‘n vergadering om arbeidstatistiek ensovoorts te bespreek, het die verklaring vergesel.”

Van der Westhuizen sê hulle sukkel al vir jare lank om ‘n vergadering met die betrokke Ministerie te kry, en niemand van die departement het by die mees onlangse vergadering wat vir November gereël is, opgedaag nie.

3 Desember 2010