‘Arbeidsmakelaars belangrik’

Foto: THEUNS BOTHA

Arbeidsmakelary moet eerder gereguleer as geheel en al verban word, meen me. Annelize Crosby, Agri SA se regsverteenwoordiger in die Parlement. Openbare verhore is by die Parlement gehou om menings in te win oor watter koers die Regering met dié soort driehoek-diensverhouding moet inslaan.

In die landboubedryf verskaf die arbeidsmakelaars tydelike werkers aan boere. Vakbonde, met Cosatu op die voorfront, vra dat dit geheel en al verban moet word omdat die stelsel nadelig vir tydelike arbeiders is. Die arbeidsmakelaarsbedryf dra sowat R3,5 miljard tot die staatskas by.

In ‘n baie emosionele sitting was daar vele oproepe dat dit verban moet word en parlementslede en sommige individue het sover gegaan as om arbeidsmakelary met mensehandel of slawerny te vergelyk. Crosby het dié verhoor as baie negatief ervaar omdat dit blyk dat daar ‘n klomp mense is wat reeds besluit het wat gedoen moet word.

Sy sê dit het gelyk of die argumente wat deur die sakewêreld en arbeidskonsultante op die tafel geplaas was nie regtig ‘n indruk gemaak het in terme van die werksgeleenthede wat in die slag sal bly as dit verban sou word nie.

Op die meegaande foto stap 'n plaaswerker teen sononder huis toe. Die foto is deur Theuns Botha geneem.

26 Augustus 2009