Bergrivier se beste werkers

Vroulike plaaswerkers het op die jaarlikse streeksuitdunne van die Bergrivierse Plaaswerker van die Jaar-kompetisie gewys dat hulle nie vir die mans op die plaas hoef terug te staan nie.

Me. Sharon Swartz van Olyvenbosch, naby die Paarl, is as die streek se Plaaswerker van die Jaar aangewys. Sy het ook eerste plek in die junior bestuur-afdeling verower.

Mee. Shuraya Ewerts van die Conradie-boerdery, naby Saron, is as die algemene werker van die jaar aangewys, Caroline Samuels van Laborans, naby die Paarl, het die administratiewe afdeling gewen, Maria Thys van die Môrester-boerdery, Piketberg, die tegniese operateur-afdeling en mnre. Kallie Hendriks van Eureka, ook naby die Paarl, die besproeiingspesialis-afdeling, Niklaas Pieters van Môrester is die trekkerdrywer van die jaar en Piet Farao van Morester die middelbestuurder van die jaar.

Mnr. Cobus Dowry, Wes-Kaapse minister van landbou, sê die ontwikkeling van mensekapitaal bly een van die sleutel-uitdagings in die ontwikkelingsprogram vir die landbou. Dowry het die kinders van plaaswerkers aangemoedig om hulle formeel in die bedryf te bekwaam.

Vanjaar is R30,8 miljoen beskikbaar gestel vir gestruktureerde landbou-opleiding. Die internskap- en leerlingskapprogram is uitgebrei om 200 mense te bevoordeel en die landbou-
mentorskapprogram is ook ingestel.

Landbouweekblad, 17 Oktober 2008