Minder werke in die landbou

Varsproduktemark. foto: THEUNS BOTHA

Die landbousektor het in Maart en Junie vanjaar onderskeidelik 738 000 en 710 000 werke verskaf, luidens die nuutste ontwikkelingsaanwysers wat die Presidensie bekendgemaak het.

In Maart en September verlede jaar was daar onderskeidelik 799 000 en 767 000 werksgeleenthede in die landbousektor.

Die ontwikkelingsyfers toon egter oor die algemeen dat daar ‘n positiewe groei in die aantal werke is wat deur verskeie sektore in Suid-Afrika geskep was.

Die aantal werke in die land het van 11,3 miljoen in Maart 2003 tot 13,6 miljoen in Maart vanjaar gestyg en die koers van werkloosheid het oor dieselfde tydperk van 31,2% tot 23,5% verminder.

Maar die land het weens die ekonomiese afswaai groot werksverliese gesien met 267 000 werke wat in die tweede kwartaal verlore gegaan het. Teen Junie vanjaar het die totale aantal werksgeleenthede op 13,4 miljoen gestaan.

Die Regering se teiken is om werkverskaffing teen 2014 te verhoog sodat sowat 16 miljoen werksgeleenthede sal bestaan.

In die informele sektor, uitsluitend landbou, was daar gedurende Maart en Junie vanjaar 2,15 miljoen en 2,1 miljoen werksgeleenthede.

In die formele sektor, uitsluitend landbou, was daar vir dieselfde tydperk onderskeidelik 9,4 miljoen en 9,35 miljoen werksgeleenthede.

29 September 2009