Staking in Ashton eindig

Die staking van werkers by die Ashton Canning vrugte-inmaakfabriek is verlede week amptelik beëindig danksy verskeie onderhandelinge tussen die Ashton Canning vrugte-inmaakfabriek en Fawu, 'n vakbond vir plaaswerkers.

Geskilpunte tussen die partye het gelei tot 'n staking wat op 13 Desember verlede jaar begin het. Ongeveer 2400 weekliks-betaalde werknemers by die fabriek het aan die staking deelgeneem.

Fawu was nie tevrede met Ashton Canning se aanbod van 'n drie persent loonverhoging en 'n wisselkoers-gekoppelde bonus nie. Die vakbond het 'n loonverhoging van ses persent tesame met 'n werkgewersbydrae van 3.5 persent geeis.

"Ons betreur dit dat Fawu hierdie roete gekies het. Die meeste werkers is seisoenwerkers. Hul enigste geleentheid om 'n goeie loon te verdien, is gedurend die vrugte-seisoen. Die staking het hulle gedeeltelik hierdie geleentheid ontneem," het mnr. Wynand du Plessis, Besturende Direkteur van Ashton Canning Maatskappy, oor die afgelope maand se gebeure gesê.

Hy sê met die aanvang van die staking het die werkgewer alle weekliks-betaalde personeel van die perseel uitgesluit. Hulle het egter gelyktydig 'n aanbod van drie persent aan die werknemers gemaak. Die loonaanbod kom neer op 'n minimum loon van sowat R2 640 per maand vir 'n werker wat skofte werk.

Mnr. Peter Visser, streeksekretaris van Fawu sê die werkgewersbydrae word sedert 1999 reeds met die inmaakfabriek bespreek. "Hulle sou 'n ondersoek instel na die kostes van só 'n bydrae." Hy sê dat Fawu nou as 'n unie samesprekings gaan hou om te sien hoe om die werkgewersbydrae op die hele vrugte — inmaakbedryf van toepassing te maak.

Du Plessis sê dat handelsomstandighede verlede jaar moeiliker as ander jare was weens 'n groter aanbod van ingemaakte vrugte op die wêreldmark.

Hy sê uitvoerders is deur regeringslui aangeraai om hul besighede by 'n sterk Rand aan te pas. "Die enigste wyse waarop ons dit kan doen, is om koste so laag moontlik te hou."

Beide partye blyk verlig te wees oor die ooreenkoms wat bereik is, aangesien dié geskil onder andere twee keer by die Kommissie vir Versoening, Bemiddeling en Arbitrasie (KVBA) gaan draai het.

Ashton Canning het geen toegewings op hul aanbod gemaak nie.

21 Januarie 2005