Werskverliese nie landbou se skuld

Plaaswerkers se huis. Foto: ERIKA FOURIE

Die landbou kan nie die morele skuld dra vir werksverliese in dié sektor nie, sê die Demokratiese Alliansie (DA). Veral aangesien dié bedryf moeilike ekonomiese toestande ondervind, waarvoor hy ook nie die skuld behoort te dra nie.

Waar’s die Regering?
Die DA sê mnr. Tokyo Sexwale, Minister van Menslike Nedersettings, se opmerkings dat die landbou verantwoordelik is vir miljoene Suid-Afrikaners wat in informele nedersettings woon, is onwaar. Wanneer plaaswerkers nie meer op plase woon nie, is dit nie omdat hulle “weggejaag” is nie, sê mnr. Lourie Bosman, die DA se skaduminister van landbou.

Volgens die DA het die Departement van Menslike Nedersettings (voormalig die Departement van Behuising ) sedert 1994 miljoene huise in en om dorpe en stede opgerig vir agtergeblewe Suid-Afrikaners, maar het tot nou nog nie een huis vir ’n plaasbewoner gebou nie. Dié verantwoordelikheid word aan die landbousektor, boere en plaaswerkers oorgelaat.

Lees ook:

Behuising vir plaaswerkers (2005)

Staat moet help met behuising (2008)

Hoeveel poste verloor?
Bosman meen die landbou het in die afgelope twee dekades gebuk gegaan onder “besonder onstuimige toestande” en dat werksverliese ’n gevolg van ’n wisselvallige ekonomiese omgewing is.

In 1994 het die landbou 1,12 miljoen permanente en tydelike werksgeleenthede gebied, maar daar is tans net 780 000 werkers in dié sektor. Sowat 340 000 mense wat in die landbou gewerk het, het dus hul werk in sowat 15 jaar verloor.

3 Februarie 2010