Zuma soek plan vir plaaswerkers

Pres. Jacob Zuma en me. Tina Joemat-Pettersson, landbouminister. Foto: ALANI JANEKE

Die bereidwilligheid om uitdagings rondom die landbou en plaaswerkers aan te spreek bestaan, maar ‘n daadwerklike plan ontbreek, sê pres. Jacob Zuma.

Hy het Vrydag (30 Julie) ‘n afvaardiging van 1 100 plaaswerkers tydens die nasionale plaaswerkersberaad in Somerset-Wes toegespreek.

Zuma het opdrag gegee dat plaaswerkersberade in elke provinsie en nasionaal aangebied moet word sodat plaaswerkers ‘n platvorm kan hê waar hulle hul saak kan stel en hul griewe kan deel.

“Plaaswerkers is een groep individue wat die afgelope 97 jaar ekonomiese en ander probleme moes uitstaan. Hul stemme moet gehoor word, want hulle is beter geplaas om eerstehandse inligting oor die uitdagings te verskaf.”

Zuma sê plaaswerkers het dieselfde mense- en sosio-ekonomiese regte as enige ander individu, en “ons sal baie bereik in dié land wanneer almal van hulle dié regte ten volle kan geniet.”

 Georganiseerde landbou wil saamwerk
“Ons moet ook die rol wat boere vervul om die lewensgehalte van plaaswerkers te verbeter, erken.” Zuma sê die Regering het onlangs baie vrugbare besprekings met Agri SA gehad, en nog ‘n vergadering word binnekort beplan. ‘n Vergadering met die arbeidsgemeenskap en leiers is ook in die pyplyn, aangesien hulle ‘n belangrike rol in al die betrokke fasette vervul.

Zuma het opgemerk dat Suid-Afrika as deel van die Suider-Afrikaanse Ontwikkelingsgemeenskap (SAOG) met ander lidlande sal saamwerk om dié kwessies aan te spreek en dat hulle suksesvolle strategieë sal uitruil.

Zuma het afgesluit met die woorde: “Ons sal nie rus totdat alle werkers menslik deur boere gehanteer word nie. Die behoefte om dinge anders te begin doen binne dié sektor van ons land bestaan. Een ding is baie opvallend, daar is ‘n bereidwilligheid onder partye om saam te werk, maar ons het nog nie vasgestel wat ons nodig het om te doen nie.”

2 Augustus 2010