10 beste Pinotage-wyne

Foto: VERSKAF

Absa se kompetisie vir sy Top 10 Pinotage-wyne het inskrywings van so ver soos Nieu-Seeland gelok. Vyf van vanjaar se wenners kom van ervare Pinotage-meesters, terwyl die ander vyf die eerste keer gewen het.

Daar was 139 inskrywings, wat ’n groei van 190 % in die getal inskrywings sedert die kompetisie se begin in 1997 aandui. Drie van vanjaar se wenwyne is van die 2008-oesjaar, vier van die 2007-oesjaar, twee van 2006 en een van 2005.

“Ons het gesien hoe die standaard en gehalte van Pinotage-wyne drasties verhoog het in die afgelope jare. Die aanvanklike doel van ons betrokkenheid by Absa se Top 10 Pinotage-kompetisie was om wynmakers te help om die gehalte van hul wyne te verhoog en die hoogste doelwit te skep waarna gestreef moet word. Wyne wat nou vir die Top 10 gekeur word, dien as maatstaf in die bedryf. Die gehalte van die wyne is deesdae op so ’n vlak dat selfs die Top 20 nou as ’n besonderse prestasie beskou word,” sê mnr. James Slabbert, uitvoerende hoof van Absa Korporatiewe en Besigheidsbank.

Die wenners is:

• Altydgedacht Pinotage 2008 (Durbanville)

• Beyerskloof Diesel Pinotage 2007 (Stellenbosch)

• Cathedral Cellar Pinotage 2006 (Kusstreek)

• Flagstone Writer’s Block Pinotage 2007 (Worcester wingerde)

• Kanonkop Pinotage 2005 (Simonsberg-Stellenbosch)

• Longridge Pinotage 2007 (Stellenbosch)

• Lyngrove Platinum Pinotage 2007 (Stellenbosch)

• Onyx Pinotage 2006 (Darling)

• Viljoensdrift River Grandeur 2008 (Robertson)

• Windmeul Reserve Pinotage 2008 (Paarl)

Die beoordelaars was mnre. Duimpie Bayly (sameroeper), Francois Naudé, Allan Cheesman, Neil Pendock, Chris Roux, Gert Boerssen en me. Wendy Burridge.

Op die meegaande foto verskyn die wenners van die kompetisie by die Val de Vie Wyn- en Polo-landgoed buite die Paarl. Voor van links is Anri Truter (Beyerskloof), Francois van Niekerk (Windmeul), James Slabbert (uitvoerende hoof: Absa Korporatiewe en Besigheidsbank), Fred Viljoen (Viljoensdrift) en Danielle le Roux (Lyngrove). Agter van links is Abé Beukes (Darling Kelders/Onyx), Clinton Le Sueur (Longridge), Abrie Beeslaar (Kanonkop), Etienne Louw (Altydgedacht), Gerhard Swart (Flagstone) en Thys Loubser (KWV/Cathedral Cellar).

31 Augustus 2009