Appel-drankies vaar goed

Appels. Foto: www.fermentarium.com

Die verkope van egte sider – wat van gegiste appelsap gemaak word en nie gegeurde mout  nie – het die afgelope jaar met 8% gegroei.

Volgens mnr. Kay Pillay, hoof van die afdeling vir sider en drinkgereeddrankies by Distell, is die volgehoue groei danksy die drankies se “egtheid, verleidelike smaak en gehalte”. Die verkope vergelyk uitstekend met die totale drankkategorie wat die twaalf maande tot Mei bykans geen groei getoon het nie.

Die segment vir gegeurde alkoholiese drankies het net met 3% gegroei. Die drankgroep Distell is egter ongelukkigheid oor mededingers wat goedkoop namaaksels vervaardig en as die ware Jakob bemark.

’n Drankie kom in aanmerking as ’n sider as dit van appel- of peersap gemaak is. Tot 25% peersap mag by appelsap gevoeg word om die produk steeds as sider te bemark. Volgens Pillay bevat Distell se siders geen peersap nie.

Meer as die helfte van die appelsap wat die maatskappy gebruik, is van Suid-Afrikaanse verskaffers.

Lees meer in Landbouweekblad se uitgawe van 27 Augustus.

25 Augustus 2010