Beïnvloed selfone bye werklik?

Heuningby. Foto: www.desktop.wallpapers.org

Ná navorsers in Indië glo bewys het dat selfone ‘n uitwerking op heuningbye se oorlewing het, het baie vrae plaaslike tussen byeboere en kundiges hieroor ontstaan. Die navorsers het werkende selfone aan ‘n byekorf gekoppel, en die optrede van die bye met dié van ‘n korf waaraan slegs ‘n model van ‘n selfoon gekoppel was, vergelyk.
 
Daar was ‘n daling in die hoeveelheid eiers wat gelê is, en minder bye het glo na die korf teruggekeer. Die verskynsel is beskryf as een van die redes vir “colony collapse disorder” of CCD.

Studies oor selfoontorings in Oostenryk
Dr. Mike Allsop, navorser van die navorsingsinstituut vir plantbeskerming, sê daar word ook studies in Oostenryk gedoen waarvolgens selfoontorings ‘n ongunstige uitwerking op bye-getalle het, terwyl Duitse navorsers ook beweer dat koordlose telefone bye-getalle laat afneem.
 
Allsop sê ondanks die navorsing se bewerings dat elektromagnetiese bestraling ‘n oorsaak van CCD is, glo die oorgrote meerderheid wetenskaplikes wat die verskynsel wêreldwyd ondersoek, dat dit nié die geval is nie.
 
Virusse en peste die hoofoorsake
Volgens Allsop dui onlangse volledige navorsing aan dat die verskynsel aan die invloed van virusse en peste toegeskryf kan word. Hy sê veral die voorkoms van virusse kan daarvoor blameer word. Die invloed van selfoonseine en selfoontorings word nie eens as moontlike oorsake genoem nie, hoewel daar wel opvattings is dat dit nie onmoontlik is dat dit een van die oorsake kan wees nie, sê hy.

Allsop sê hy stem nie saam met die bevindings van veral die Duitse en Indiese studies nie. “Die studies is misleidend en verslaggewing daaroor was nie korrek nie. In die geval van die Duitse studie het die navorsers die eksperiment weer uitgevoer en ander resultate gekry.

Allsop meen selfoonmaatskappye kan behoorlike studies hieroor onderneem sê om die wanindrukke wat hieroor bestaan reg te stel.

Verslaggewer Alani Janeke verduidelik hoe die Indiese studie uitgevoer is. Luister hier na 'n klankgreep.

15 Junie 2010