Bedryfsintelligensie stut kelders

Wynkelder. Foto: ALANI JANEKE

Ondanks die wêreldwye resessie  en ongunstige wisselkoerse het sowat 70% van Suid-Afrika se wynkelders hul finansiële posisie behou, of selfs verbeter vanjaar.

Slegs 17% van kelders het ernstige kontantvloei- en finansiële probleme ondervind.

“Talle van dié presteerders gebruik bedryfsintelligensie (BI)-stelsels om akkurate voorspellings te maak rondom volumes en pryse. Dít verseker tydige en pro-aktiewe reaksie op veranderinge in die mark,” sê mnr. Frans van Wyk, direkteur van raadgewende dienste by PriceWaterhouseCoopers (PwC). Dié groep het onlangs die tussentydse finansiële resultate van produserende wynkelders in Suid-Afrika hersien.

“BI-stelsels is ook belangrik om met die waardeketting te kommunikeer sodat primêre produsente ingeligte besluite kan maak rondom die aanplanting van kultivars.” Die vermoë om goeie pryse te realiseer het ‘n direkte uitwerking op produsente se finansiële posisie.

Volgens ‘n mediaverklaring van PwC toon statistiek dat primêre wynprodusente elke jaar sowat R12,2 miljard, of 7,3%, bydra tot die ekonomiese bedrywighede in die Wes-Kaap. Kelders wat swaar trek sal heel moontlik ernstige herstrukturering moet ondergaan om mededingend te bly, lui die verklaring.

“Ons verwag samesmelting op bemarking- en handelmerkvlak, en die aanstelling van die beste talent in die bemarkingsektor,” sê Van Wyk. “Hoewel die gehalte van die produk en die klimaat kwessies van belang sal bly, verwag ons dat markintelligensie die sleutelfaktor vir sukses sal wees.”

11 November 2010