Beleid oor bio-brandstof hersien?

Mielies. Foto: ELARDUS ERASMUS

Die staat moet weer na die land se bio-brandstofbeleid kyk en heroorweeg om mielies as ‘n grondstof in te sluit, sê me.Tina Joemat-Pettersson, Minister van Landbou, Bosbou en Visserye.

Sy het Vrydag (8 Oktober) tydens Agri SA se kongres in Mulderdrif opgemerk dat sy glo dat die verandering ‘n oplossing vir die surplus van vier miljoen ton mielies in die land kan beteken.

“Aangesien die departement (landbou) nie die beleid bepaal nie, is dit belangrik dat die insette wat gelewer word, baie sterk moet wees en dat die departement en die georganiseerde landbou daaroor moet ooreenstem,” sê die minister.

Sy het opgemerk dat dit van groot belang is dat, as die Regering en die georganiseerde landbou oor veral strategiese kwessies verskil, hulle in ‘n private hoedanigheid met mekaar moet kommunikeer voordat dit in die media bespreek word.

Die Mededingingskommissie
Intussen het Joemat-Pettersson gesê sy en mnr. Neels Ferreira, voorsitter van Graan SA, en dr. Kobus Laubsher, uitvoerende hoof van dié organisasie, gesels weer met die Mededingingskommissie oor oplossings vir die surplus mielies.

“Ons onderhandel tans met die kommissie dat ‘n uitvoerpoel vir die mielies wel ‘n moontlikheid moet word. Hulle gesels nou met ons, waar hulle vroeër net die idee afgeskiet het en nie daaroor wou praat nie.”

Ferreira het opgemerk dat hy nie dink die kommissie interpreteer die wet tot voordeel van die land nie. “Ons was almal aanvanklik opgewonde toe die kommissie tot stand gekom het. Tans is ek egter onseker oor die kommissie se interpretasie van die wet en of dit in die langtermyn goed vir die land is nie.”

Volgens Ferreira het die land al 105 000 werksgeleenthede verloor omdat ‘n bio-brandstofbeleid nie behoorlik toegepas word nie, weens die moratorium op die gebruik van mielies.

8 Oktober 2010