Biltong in die ruimte?

Biltong. Foto: THEUNS BOTHA

Biltong, ‘n eg Suid-Afrikaanse produk, word deur die Kanadese ruimte-agentskap getoets om te bepaal of dit gepaste voedsel vir ruimtevaarders op sendings kan wees. ‘n Suid-Afrikaanse egpaar, mnr. en me. Rod en Mal Paterson, wat in Cranbrook in Kanada woonagtig is, is die eienaars van Biltong Canada en vervaardig biltong vir die Kanadese mark.

Die ruimte-agentskap se Operational Space Medicine Group (OSM) het die Patersons in Oktober verlede jaar genader, luidens ‘n berig op die Montreal Gazette se webwerf. “Hulle het ons gevra om klein voorbeelde (50g en 100g pakkies) aan te stuur." Die OSM het ook spesifiek inligting gesoek rakende die raklewe van gedroogde vleis.

Die meeste van die kos wat Kanadese ruimtevaarders op die Internasionale Ruimtestasie eet is gedroog aangesien daar nie yskasgeriewe op die stasie is nie. Kos wat gereed is om te eet is ‘n groot voordeel in die ruimte en vaarders kan hul eie kos kies voor elke sending.

5 Januarie 2011