Brasiliaanse beesvleis welkom?

Brasilaanse beesvleis. Foto: thecattlesite.com

’n Suid-Afrikaanse verbod op die invoer van Brasiliaanse beesvleis sal waarskynlik binnekort opgehef word. Die verbod geld sedert bek-en-klouseerin 2005 in dele van Brasilië uitgebreek het.

Mnr. Gerhard Schutte, uitvoerende hoof van die Rooivleisprodusente-organisasie (RPO), sê hy is bewus daarvan dat die twee lande se regerings die verbod gaan ophef. “Die regte spelreëls word gevolg en ons het geen besware nie. Ons is ten gunste van suid-suid-handel en Brasilië het hard gewerk om sy status as vrye sone vir bek-en-klouseer te herwin.”

Al is Brasilië die wêreld se grootste uitvoerder van beesvleis, meen Schutte dat die opheffing van die verbod nie ’n groot verskil in Suid-Afrika sal maak nie. “Slegs 8% van Suid-Afrika se beesvleis word ingevoer en daarvan is meer as 5% van buurlande. Brasilië is nietemin ’n beduidende belanghebbende omdat hy die wêreld se grootste beeskudde (190 miljoen) het en kostedoeltreffend kan produseer.”

Lees meer in Landbouweekblad se uitgawe van 16 Julie 2010.

9 Julie 2010