Clover beplan afleggings

Foto: GRETCHEN PEISER

Clover het aangedui dat hy sowat 90 werkers by sy hoofkantoor in Roodepoort gaan aflê om personeelkoste te verlaag en huidige ongunstige ekonomiese toestande teen te werk. Volgens die suiwelmaatskappy geniet alle koste aandag, maar is “die verlaging van personeelkoste ‘n prioriteit”.

Die vakbond Solidariteit sê dié stap is “uiters onnodig”. Luidens ‘n persverklaring van dié organisasie doen gerugte die rondte dat Clover verdere afleggings beplan. “Daar is sprake dat Clover beoog om uiteindelik tussen 300 en 500 werknemers van die groep se 6 377 werknemers af te lê om moontlik tussen R80 miljoen en R150 miljoen in personeelkoste te bespaar. Die beplande afleggings is egter onnodig, veral as gekyk word na die sukses wat Clover in die geldjaar tot en met Junie vanjaar getoon het,” sê mnr. Jaco Kleynhans, woordvoerder.

Die suiwelfirma het in dié bogenoemde tydperk sy bedryfswins van R297 miljoen tot R750 miljoen verhoog en het sy wins met 329% tot R540 miljoen gestyg.

In April vanjaar het Clover ook sy kaasaanleg by Wesselsbron gesluit en hoewel daar ook 90 werkers deur dié proses geraak sou word, is afleggings verminder deur deelname aan ‘n konsultasieproses. Altesaam 31 van die Wesselsbron-werkers is na die Clover-aanleg in Lichtenburg oorgeplaas, sê Kleynhans.

9 Oktober 2009