Distell herwin glasbottels

Glasherwinning. Foto: www.nowpublic.net

Die Suid-Afrikaanse drankmaatskappy Distell het die poging om sy koolstofvoetspoor te verklein, nog ‘n stappie verder geneem.

Benewens die inisiatief om wyn en sider in ligter glasbottels te verpak, is ‘n projek geloods vir die hergebruik van glas. Dit word “gee terug, kry terug” genoem en sit tot vier keer meer geld in verbruikers se sakke as breekglas (die glas in herwinningshouers).

Mnr. Frans Booysen, bestuurder van Distell se herwinningshouers, sê die maatskappy betaal sy handelsklante na gelang van die grootte en soort tussen 80c en R1,50 vir elke bottel wat ingegee word. Kleinhandelaars betaal hul klante vir die bottels met die maatskappy se kenteken wat hulle ingee.

‘n Netwerk van 1 600 bottelhandelaars word by die projek betrek.

Hoe werk dit?
Wanneer Distell die bottels ontvang, word die etikette verwyder en dit gaan deur verskeie was- en spoelsiklusse. Bottels wat aan streng standaarde voldoen word hervul en die res word as breekglas herwin. Die bottels kan tot tien keer weer gebruik word.

“Tussen Julie 2009 en Junie vanjaar kon ons 132, 3 miljoen bottels weer gebruik en het ons 73 268 ton glas gespaar. Dit is gelyk aan 11 079 ton koolstofdioksied-ekwivalente vrystellings indien ons nuwe bottels moes laat maak,” sê Booysen.

Volgens hom is die maatskappy al meer as 20 jaar by inisiatiewe vir die herwinning van glas betrokke, maar wil die huidige terugbesorgingskoers van 60% na 65% binne een jaar verhoog.

4 Augustus 2010