Gevreesde siekte by vee

’n Gevreesde siekte wat aborsies by kleinvee en Malta-koors by mense veroorsaak, is in ’n bokkudde in Gauteng geïdentifiseer. Minstens twee mense is ook met die siekte gediagnoseer.

Die Wêreldgesondheidsorganisasie beskou die siekte, Brucella melitensis (besmetlike misgeboorte by beeste se ekwivalent by kleinvee), as gevaarlik, sê dr. Sunelle Strydom van die direktoraat dieregesondheid by die Departement van Landbou, Bosbou en Visserye.

Help

Sy het op die Suid-Afrikaanse Veterinêre Raad se webtuiste ’n beroep op alle veeartse gedoen om die direktoraat te help om die voorkoms van die siekte aan te teken, te voorkom en enige gevalle betyds aan te meld.

Die siekte word oorgedra wanneer diere aan geaborteerde fetusse en hul plasentas of vaginale uitskeidings lek of suig. Infeksie kan ook plaasvind wanneer lammers besmette melk drink. Diere wat oornag in krale staan, is ook in die ideale omgewing vir die oordrag van die siekte.

By mense word die siekte deur regstreekse of onregstreekse kontak met siek diere of hul produkte (soos wol) oorgedra. Gekookte melk- en vleisprodukte kan nie die siekte versprei nie. Koors, nagtelike sweet, hoofpyne, gewrigs- en beenpyn, spierpyn, swakheid, gewigsverlies, naarheid en depressie is simptome wat tipies by mense voorkom.

Simptome

Volgens Strydom is die eerste teken van die siekte ’n “aborsiestorm” en groot persentasies dragtige diere aborteer. Aborsies kan in daaropvolgende seisoene afneem, maar kuddes kan jare lank besmet bly. “Lammers van besmette vroulike diere kan by geboorte swak of asimptomaties wees. Daar word vermoed sommige van hierdie lammers kan latente draers word.”

Ander simptome sluit in retensie van die fetale membrane, genitale uitskeidings, ’n afname in melkproduksie, artritis en ’n afname in vrugbaarheid by manlike diere.

Die siekte is die eerste keer in 1965 in Suid-Afrika geïdentifiseer toe dit in drie skaapkuddes in die destydse Noord-Transvaal uitgebreek het. Sedertdien was daar sporadiese uitbrekings in Gauteng, KwaZulu-Natal en Noordwes.

24 Januarie 2011