Leer oor boerdery onder beskutting

Van die produkte wat deur die ekspo verteenwoordig word. Foto: ALANI JANEKE

Groot opgewondenheid heers oor die eerste ekspo vir boerdery onder beskutting wat in Maart in Centurion sal plaasvind.

Me. Hanlie Delport, geleentheidsbestuurder vir die Undercover Farming Ekspo en konferensie, sê hoewel dié bedryf reeds sedert 1973 in die land bestaan, is dit die eerste keer wat ’n ekspo aangebied word om dié bedryf aan die publiek bekend te stel.

Die ekspo en konferensie, wat op intensiewe boerderytegnieke en bedrywe fokus, beoog om ’n bron van inligting te wees vir bestaande boere en aankopers van groente, blomme, vrugte en saailinge wat onder beskutting verbou word.

Uitstallers 
Die organiseerders het aanvanklik gehoop dat sowat 30 uitstallers by die ekspo betrek kan word. “Uiteindelik het ons sowat 70 uitstallers, en die idée het al so gegroei dat die ekspo nou oor drie dae sal plaasvind,” vertel Delport.

Van die uitstallers wat reeds hul betrokkenheid bevestig het, sluit in Ball Straathof, Dekker Chrysanten, Elro J. Braak, Greenhouse Tegnologies, Infigro, Rijk Swaan, die “Holland Square” van die Nederlandse ambassade, Fibrego Organics, Hytech Agriculture, Hishtil South Africa, Alweco South Africa, Greener Solutions, Klein Karoo Seed Marketing en Hygrotech.

“Undercover Farming Ekspo skep ’n spilpunt vir hierdie sektor en ’n ideale platform vir kenners in die bedryf om op die hoogte van ontwikkelinge in die sektor te wees en om met sleutelmense in die bedryf te skakel,” aldus Delport.

Konferensie
Delport sê een van die hoogtepunte op die ekspo is die konferensie wat as deel daarvan aangebied sal word. Die konferensie word me die samewerking van Agribusiness in Sustainable Natural African Plant Products (ASNAPP) aangebied. Die doel daarvan is om verminderde koolstofvrystelling en intensiewe boerderygebruike te ondersoek en te ondersteun.

Van die onderwerpe wat op die konferensie bespreek sal word, is vooruitsigte vir die bemarking van vars produkte in Suid- en Suider-Afrika, die impak en toepasbaarheid van NEMA 28 (Environmental Duty of Care) in die landbousektor en die produksie en uitvoer van blomme vanuit Suid-Afrika.

Sprekers van Nederland sal aan die konferensie deelneem en die Departement van Landelike Ontwikkeling en Grondhervorming het ook sy deelname bevestig.

Die ekspo sal van 6 tot 8 Maart vanjaar by die Saint George Hotel in Centurion plaasvind. Vir meer besonderhede besoek www.undercoverfarmingexpo.co.za.

19 Januarie 2012