Melkkartel: Wat gaan aan?

Melkbeeste. Foto: THEUNS BOTHA

Die Mededingingsappèlhof sal op 7 Desember Milkwood Dairy en Woodlands Dairy se aansoek om appèl teen ‘n beslissing, wat deur dié hof gelewer is, aanhoor. Indien die verwerkers se aansoek om appèl slaag, kan hul die beslissing in die Hooggeregshof beveg.

Op 26 Augustus vanjaar het die Mededingingsappèlhof ‘n gedeelte van ‘n besluit, wat op 17 Maart deur die Mededingingstribunaal gemaak is, ter syde gelê en met ‘n nuwe bevel vervang. Dít is die jongste gebeurtenis in die voortslepende ondersoek na moontlike oortredings van die Wet op Mededinging (Wet 89 van 1998) tussen sewe suiwelverwerkers.
 
Die Mededingingsappèlhof het op 26 Augustus beslis dat die klagtes teen Milkwood en Woodlands nie geskrap mag word nie. Dit het ook beslis dat die Mededingingskommissie se lasgewing, waarmee inligting van Woodlands bekom is, onregmatig was.

Die kommissie mag gevolglik nie die betrokke inligting by hul ondersoek insluit nie. Alle dokumente wat op dié wyse bekom is, moes aan Woodlands terugbesorg word. Milkwood het ‘n soortgelyke versoek gerig, maar dit is van die hand gewys.

Die suiwelverwerkers wat van ongerymdhede beskuldig is, is:
•    Clover Industries en Clover SA (Ontvang korporatiewe toegeeflikheid by Mededingingskommissie vir die sesde aanklag.)
•    Parmalat
•    Ladismith kaas
•    Woodlands Dairy
•    Lancewood
•    Nestlé SA
•    Milkwood Dairy

Hoewel almal nie van alle kwessies aangekla is nie, is die volgende beskuldigings teen die verwerkers gebring:
1.    Uitruil van inligting tussen mededingers.
2.    Uitruil van melk en verskaffingsooreenkomste tussen verwerkers.
3.    Die misbruik van eksklusiewe verskaffingskontrakte met melkprodusente.
4.    Die vasstelling van kleinhandelpryse en markverdeling.
5.    Die vasstelling van kleinhandelspryse.
6.    Die vasstelling van pryse en/of die verhandeling van melk en verwerkte produkte.

Wat is die geskiedenis?

So lyk melkkartel (Januarie 2007)

Melksaak sal stadig vorder (Januarie 2007)

Clover draai staatsgetuie (Januarie 2007)

Clover beloof samewerking (Julie 2007)

Melk-verhoor skop af (Februarie 2008)

Melkprys-verhoor kry koers (Februarie 2008)

Clover wil uit saak wriemel (Junie 2008)

Melkverwerkers-appèl misluk (Julie 2008)

Melkverhoor: Verwerkers skop teë (Januarie 2009)

'Straf melk-knoeiers swaar' (Januarie 2009)

Nog melkers wil uit saak (Januarie 2009)

Melk-lasbriewe ongeldig (Maart 2009)

Melksage: Geleke inligting moet terug (Augustus 2009)

4 Desember 2009