Nóg renosters doodgemaak

renosters. Foto: LANDBOUWEEKBLAD

Agt wilddiewe word gesoek nadat twee renosters Maandag (23 Augustus) op ‘n plaas in Limpopo doodgemaak en hul horings afgekap is.

Luidens ‘n verklaring het die voorval op Elandsfontein tussen Mookgopong en Vaalwater plaasgevind.

Lt.-kol. Ronel Otto van die SA Polisiediens sê die groep het glo twee plaaswerkers aangeval, aangerand en vasgebind. Die verdagtes het na bewering toe na die kamp waar die renosters aangehou is gegaan en die twee diere doodgeskiet en hul horings verwyder.

Die verdagtes het per voet gevlug na ‘n voertuig wat langs die pad gewag het. Otto sê 17 rondtes ammunisie is op die toneel gevind en daar word vermoed dat die diere met R5-gewere doodgeskiet is. 

Spesiale komitee om kwessie aan te spreek
Intussen berig Business Day ‘n komitee is op die been gebring om die stryd teen renosterstropery te help veg. Omgewingsbewaringsgroepe het hul steun by die Suid-Afrikaanse renosterberaad in Johannesburg, waar die komitee gestig is, aan die bewaring van renosters toegesê.

Die beraad het gehoor dat 180 renosters tot dusver vanjaar vir hul horings doodgemaak is. Verskeie owerhede ondersoek tans die styging in dié misdaad.

Die komitee wil een inbellyn vir die aangee van verdagte bedrywighede op die been bring en sal ook fondse insamel om die misdaad te probeer bekamp.

24 Augustus 2010