’n Uitdaging aan jong boere

Jongboere in die Wes-Kaap word aangemoedig om in te skryf.

Jong boere in die Wes-Kaap, mans en vroue, word uitgedaag om mekaar die stryd aan te sê in die 2012 Jongboer van die Jaar-kompetisie.

Luidens ’n verklaring sluit registrasie vir die kompetisie reeds op 23 Januarie 2012 en die spertyd vir inskrywings is 12 Februarie 2012.

Agri Wes-Kaap sê die kompetisie bied jong boere die kans om hul boerderyvernuf en bestuursvermoë te toets. Die kompetisie plaas ’n sterk fokus op die vernuf van die jong boer en die entrepreneurskap waarmee die deelnemer sy bedrywighede verbeter.

“ ’n Groot deel van die beoordelingskriteria hou verband met die bestuursfilosofie van die boer sowel as die tegniese vaardighede waarmee daardie filosofie in die praktyk toegepas word,” lui die verklaring.

Vorige deelnemers
Mnr. Jan Viljoen, ’n voormalige wenner, beskryf die kompetisie as ’n geleentheid wat met albei hande aangegryp moet word. Hy was aanvanklik huiwerig om in te skryf, maar was uiteindelik baie dankbaar dat hy dit wel gedoen het.

Mnr. Werner du Plessis, verlede jaar se wenner, sê jong boere se gesindhede en benadering tot boerdery behoort ’n inspirasie te wees vir jong mense, wat ’n loopbaan in boerdery oorweeg.

Vereistes vir deelname sluit in:

1) Deelnemers moet reeds een jaar lank ’n opbetaalde lid van Agri Wes-Kaap wees.
2) Deelnemers moet 35 jaar of jonger wees op die dag waarop die inskrywings vir die kompetisie sluit.
3) Nasionale wenners van vorige jare mag nie weer deelneem nie.

Belangstellendes kan Agri Wes-Kaap by 021-860 3804 of Surika@awk.co.za kontak.

16 Januarie 2012