Nog grond vir biobrandstof

Die Regering beraam dat 'n bykomende 4 miljoen hektaar grond aangeplant sal moet word vir gewasse om as grondstof vir die biobrandstof-aanlegte te dien.

Mnr. Masiphula Mbongwa, direkteur-generaal van die Departement van Landbou, het op die kongres van die National African Farmers' Union in Bloemfontein gesê voorlopige aanduidings toon dat dit grond met 'n hoë tot medium potensiaal in die Oos-Kaap, KwaZulu-Natal, Noordwes en die Vrystaat sal wees.

Mbongwa sê dit sal grond wees wat tans onderbenut is. Hy sê die produksie van gewasse vir biobrandstofdoeleindes hou geen gevaar vir voedselsekerheid in nie. Daar is steeds kommer in seker geledere, ook in die staatskringe, dat die produksie van voedselgewasse vir die gebruik in biobrandstof 'n netelige saak is. "Ons moet die kos op die grond met 'n hoë potensiaal en die voer (vir die aanlegte) op grond met 'n medium potensiaal produseer," het Mbongwa gesê.

Volgens hom moet daar teen volgende maand verslag gedoen word aan die lekgotla, die dinkskrum uit die Parlement wat uit groter verteenwoordiging as net kabinetslede bestaan. Teen Oktober moet verslag aan die Kabinet gedoen word oor die vestiging van die biobrandstofbedryf. Die Kabinet het einde verlede jaar reeds drie belangrike besluite geneem. Dit was dat 'n strategie vir biobrandstof opgestel word met die doel om werk te skep, 'n taakgroep is aangestel om die strategie te ontwikkel en die taakgroep is die magtiging gegee om onmiddellik alle belanghebbendes te betrek.

Mbongwa sê dit is onontbeerlik dat alle rolspelers betrokke raak. "Ons sal nie kan wegstap van dié inisiatief nie. Ons sal dit moet maak werk," het hy gesê.

30 Junie 2006