Nog 'n rekord vir bokhaar

Bokhaarpryse het op die jongste veiling in die Baai tot nuwe rekordvlakke gestyg en die gemiddelde prys van R94,80/kg is die hoogste wat nóg op 'n veiling vir dié vesel behaal is. Die prys is volgens Sybokhaar Suid-Afrika nagenoeg 20 % hoër as op die vorige veiling en 120 % beter as die gemiddelde pryse op die ooreenstemmende veiling 'n jaar gelede. Die styging is hoofsaaklik toe te skryf aan die samestelling van die aanbod wat uit groot hoeveelhede goeie klein- en jonbokhaar bestaan het.

Kleinbokkiehaar se prys het met 18 % verbeter, jong bokhaar was 12 % duurder, terwyl fyn- en sterkgroothaar se pryse met onderskeidelik 5 % en 3 % gestyg het. Die hoogste prys van R300/kg is op CMW se veiling betaal vir 'n baal kleinbokkiehaar van mnr. Barries Snjiman van Vleikuil-boerdery op Rietbron.

Die gemiddelde pryse vir die belangrikste tipes in R/kg (die vorige seisoen se pryse tussen hakies) was soos volg: Kleinbokkiehaar, R160,56 (R100,57); jongbokhaar, R100,80 (R51,97); fyn groothaar, R77,06 (R33,83); sterk groothaar, R72,30 (R32,32); loks en gekleurde haar, R61,49 (R24,88). Die omset vir die 245 702 kg haar was R23,3 miljoen — R14 miljoen meer as op die vorige veiling. Die volgende veiling word op 11 April gehou.

24 Maart 2006