Nuwe gesig by Graan SA

Dr. Marinda Visser. Foto: VERSKAF

Die voormalige hoofdirekteur van die Departement van Landbou, Bosbou en Visserye sluit binnekort by Graan SA aan.

Luidens ’n verklaring is dr. Marinda Visser as die bestuurder van bedryfsdienste aangestel. Sy volg mnr. Nico Hawkins op, wat die organisasie se diens einde vanjaar verlaat. Visser is die eerste vrou wat dié pos beklee.

Visser kom oorspronklik van Prieska in die Noord-Kaap. Sy het in 2003 die graad Ph.D. as plantpatoloog by die Universiteit van Pretoria verwerf, waarna sy onder meer agt jaar lank by die Landbounavorsingsraad gewerk het.

Bedinging
Binne die departement is Visser bekend vir haar ywer om marktoegang vir Suid-Afrika te beding. Sy was die afgelope paar maande veral gemoeid daarmee om vir Suid-Afrikaanse mielies toegang tot die Chinese mark te kry. Die organisasie sê dít is ‘n doelwit wat sy gemaklik binne Graan SA kan voortsit, tot voordeel van al sy produsente.

Visser het ook goeie bande en verhoudings met ander staatsdepartemente en kollegas in ander lande, wat tot die organisasie se voordeel sal wees.

“Ek het ’n lang verbintenis met Marinda en het haar oor jare met belangstelling dopgehou tydens internasionale onderhandelinge.

"Haar aanstelling is ʼn integrale deel van die nuwe strategie wat Graan SA volg om nader aan die Regering te beweeg oor oplossings vir belangrike kwessies, soos voedselsekerheid, werkverskaffing en volhoubare transformasie,” aldus mnr. Jannie de Villiers,   uitvoerende hoofbestuurder. 

4 November 2011