Nuwe inligtingstelsel vir landbou

Koring. Foto: CHARLES SMITH

’n Inligtingstelsel vir die primêre landbou waardeur Suid-Afrikaanse boerderye met hul internasionale eweknieë vergelyk kan word, is in Pretoria bekend gestel.

Die inligtingstelsel spruit voort uit samewerking tussen die Nasionale  Landboubemarkingsraad (NLBR), die Universiteit van Pretoria (UP) en die Universiteit van die Vrystaat (UV), oor die afgelope drie jaar met ’n internasionale netwerk, Agri Benchmark, wat deur die Duitse landbou-organisasie gekoördineer word.

Volgens mnr. Yelto Zimmer van die instituut vir landbou-ekonomie by die Johann Heinrich von Thünen-instituut is daar reeds 22 lande betrokke by die opnames oor plase waarop kontantgewasse verbou word. Dit verteenwoordig die meeste produsente van grane en oliesade in die wêreld.

Daar is ook 27 lande betrokke oor bees- en skaapboerdery en dit verteenwoordig 71% van die bedryf. Die mikpunt is om ’n vergelykbare internasionale grondslag vir soortgelyke boerderye daar te stel.

Eerste bevindinge bekend
Van die eerste bevindinge vir Suid-Afrika is verlede week bekend gemaak. Dit het saamgeval met die Buro vir Voedsel en Landboubeleid (BFAP) se jaarlikse bekendstelling van die vooruitskouing vir die landboubedryf op die lang termyn.

Van die bevindings oor Suid-Afrikaanse boerderye sluit in dat koringverbouing onder  besproeiing soortgelyke opbrengste lewer as in Europa, dat kunsmisverbruik duurder en minder doeltreffend is (moontlik omdat peulgewasse minder in wisselbou benut word), dat arbeidsproduktiwiteit laag is en dat die koste van beesvleisproduksie tussen laag en middel is vergeleke met ander lande.

Dr. Andre Jooste, senior bestuurder by die NLBR, sê die vennootskap tussen Agri  Benchmark SA en die internasionale organisasie is daarop gerig om inligting oor primêre boerderye in Suid-Afrika weer op ’n internasionale grondslag te kry.

19 Augustus 2010