Steenvrugte: Mark onder druk

Perskes. Foto: www.pickyourown.org

Die steenvrugtemark staar dié seisoen verskeie uitdagings in die gesig, veral weens swak wisselkoerse.

Luidens ‘n berig op Fresh Plaza dra sterker mededinging vanuit Suid-Amerika en stygende insetkoste by tot dié probleme.

Pruime
Die pruimbedryf ondervind tans erge mededinging van Argentinië, wat ‘n 400%-verhoging in produksie voorspel. Dié styging word grootliks toegeskryf aan die afwesigheid van gebruiklike ryp en haelstorms waaronder die land gewoonlik gebuk gaan. Sowat 160 300 ton word verwag, in vergelyking met die 33 200 ton van verlede jaar.

Mnr. Jako van Lill, woordvoerder vir Fruits South Africa, sê oor die algemeen is volumes tans hoër as in die vorige jaar, terwyl sommige variëteite – soos Pioneer – se volumes aansienlik gedaal het. Die groottes is ook kleiner weens wisselende weerstoestande tydens die groeiseisoen.

Perskes
Volgens mnr. Bernd Julicher, besturende direkteur van AgriLink – wat in perskes en kaalperskes spesialiseer - sê hulle volumes en gehalte was goed, hoewel die vrugte ook kleiner was. Die kleiner vrugte beperk uitvoere aangesien dit slegs Brittanje is wat dié vrugte aanvaar.

Julicher sê die grootste probleem wat uitvoerders tans beleef is die wisselkoerse. Die swak dollar, pond en euro maak Suid-Afrikaanse produkte duurder en pryse is tussen 15% en 18% laer, wat na produsente teruglei, vergeleke met verlede jaar. Die koste van verpakking het ook met sowat 16% gestyg.

Van Lill stem met Julicher saam, en sê dit is baie belangrik dat hulle hul marksegment tans moet behou vir die volgende seisoen.

11 Januarie 2011