Vleis: Pryse styg bestendig

Rooivleis. Foto: NEVILLE LOCKHART

Die vraag na en die pryse van rooivleis sal waarskynlik in die volgende vyf jaar bestendig styg.

Veeverliese weens ongediertes en diefstal knou egter die bedryf in KwaZulu-Natal, sê mnr. Hendrik Botha, voorsitter van die Rooivleisprodusente-organisasie (RPO) in dié provinsie.

Daar kan verwag word dat die gemiddelde verbruik van beesvleis teen 2019 sowat 17% hoër sal wees as nou, skaapvleis sowat 31% en varkvleis sowat 14%. Die gemiddelde veilingsprys van beesvleis kan teen 2015 sowat R30/kg wees en dié van skaapvleis sowat R60/kg.

Die vleispryse is die hoogste in die geskiedenis. Botha het boere gewaarsku om dit koelkop te benut deur nóg beter te boer. In die landbou is daar altyd siklusse waarin pryse op en af  beweeg.

Ten opsigte van die statutêre heffings en vrywillige heffings en waarvoor dit gebruik word, sê Botha sowat R8 miljoen sal vanjaar vir navorsing vir die rooivleisbedryf beskikbaar wees. Dit word saamgestel uit sowat R3 miljoen uit die statutêre heffing, sowat R2,5 miljoen uit die Trustfonds wat gestig is ná die ou Vleisraad ontbind het en nog sowat R2,5 miljoen wat van die owerheid verwag word op ’n teenprestasiegrondslag ten opsigte van die geld wat die  bedryf  bewillig.

Nóg sowat R500 000 word van die Vleisbedryfstrust verwag. Dit sal bestee word om aandag te gee aan die ongedierteprobleem en die invloed van aardverwarming op die bedryf.

Lees meer in Landbouweekblad se uitgawe van 18 Februarie 2011.

15 Februarie 2011