Water onder loep in Overberg

Water. Foto: LEANA ERASMUS

ʼn Openbare vergadering om ʼn visie vir waterhulpbronbestuur in die Overberg te bepaal - waarop die visie vir die hele Breede-Overberg gebou sal word - vind plaas op Donderdag, 20 Mei, in die Cumberland Hotel in Worcester. Die vergadering begin om 09:30.

Die Breede-Overberg opvanggebied-bestuursagentskap (BOCMA) is besig om ʼn strategie te ontwikkel om die waterhulpbronne in die gebied vir toekomstige groei en ontwikkeling te bestuur.

Volgens me. Bea Whittaker, kommunikasiebestuurder vir die projek, moet daar eerstens ʼn goeie begrip van die gebied se sosio-ekonomiese dryfvere verkry word, en daar moet bepaal word wat belanghebbers se visie vir die gebied is.

Hoewel die begrip van ‘water vir groei en ontwikkeling’ nog in sy kinderskoene is, word die druk op waterhulpbronne en die ekonomie wat daarop berus, al hoe groter. In die Breede-Overberggebied heers daar veral kommer oor die agteruitgang in watergehalte, en die uitwerking op die landbou en sy uitvoerprodukte.

Onbeplande en onbeheerde ontwikkeling, veral langs die kus, hou ʼn verdere bedreiging vir die volhoubaarheid van waterhulpbronne in. ‘n Gebrek aan koördinasie tussen beplanningshulpmiddels kan ʼn ook ernstige uitwerking hê op belangrike waterhulpbronne en spesifieke ekosisteme wat beskerm moet word. Daar is dus ʼn groot behoefte aan ’n meer geïntegreerde benadering tot beplanning in die algemeen, en ʼn beter begrip van die belangrike rol van water in sosio-ekonomiese ontwikkeling.

‘n Werkwinkel oor die aangeleentheid word ook op Maandag, 17 Mei, om 09:00 in die Hermanus Ouditorium gehou.

Belanghebbers wat aan hierdie besprekings wil deelneem of die werkwinkel wil bywoon, kan met Whittaker by 028 341 0430 of milkwood@hermanus.co.za in verbinding te tree om meer inligting te kry.

12 Mei 2010