Om jong Breyden Groenewald se eerste verjaardag iets besonders te maak, het sy ouers heelwat moeite gedoen met ’n John Deere-speelgoedtrekker én ’n groen verjaardagkoek!

Mev. Chantell Groenewald van Secunda het die meegaande foto’s van klein Breyden vir Landbou.com gestuur. Sy en haar man, Breyten, se harte het geswel met trots oor dié klein rakkertjie.

Chantell het laat weet dat die foto’s op die plaas Rietfontein, sowat 5km buite Trichardt, in Mpumalanga geneem is. Op dié plaas is ’n saai- en veeboerdery.

Die Groenewalds woon tans op Secunda, maar was vir sowat ses jaar woonagtig op hierdie plaas. "Die plaas en plaaslewe sowel as die diere lê ons baie na aan die hart, en so ook bring ons nou nog baie kosbare tyd oor naweke saam met ons vriende en kinders op die plaas deur,"skryf sy.

* Nou ja, as jou van Groenewald is, is jou toekoms ook seker Groen!