Kleinboere vra vir meer van staat

Kleinboere by die Parlement. Foto: JOYLENE VAN WYK

Kleinboere van die Noord- en Wes-Kaap het weer ‘n memorandum aan die Departement vir Landbou, Bosbou en Visserye by die Parlement oorhandig nadat die een wat hulle twee jaar gelede oorhandig het nie juis aandag geniet het nie.

Die kleinboere wat die veldtog vir voedselsoewereiniteit uitmaak, wil onder meer hê dat streng beperkings op privaateienaarskap van grond ingestel word en dat slegs diegene wat hul grond self bewerk toegelaat word om dit te besit.

Dr. Peter Thabete, waarnemende direkteur-generaal van die Departement vir Landbou, Bosbou en Visserye, het die memorandum namens minister Tina Joemat-Pettersson ontvang.

In 2008 het die groep sy kwessies aan die vorige landbouminister, me. Lulu Xingwana, uitgespel, maar pogings om gehoor te word, het niks opgelewer nie. Mnr. Danie Engelbrecht, voorsitter van die veldtog vir voedselsoewereiniteit, sê die mense het nie grond om op te boer nie en diegene wat grond het, kry te min geldelike hulp van die Regering om dit werkbaar te maak.

Hulle wil hê dat daar ‘n radikale herverdeling van die land se grond moet kom ten gunste van arm mense. Verder is hulle teen die koop en verkoop van water en meen dat die kommersialisasie hiervan armes se dood kan kos.

21 Junie 2010