'Publiek met wet teenstaan'

Die Demokratiese Alliansie (DA) meen dat die Parlementêre proses rakende die omstrede Wetsontwerp op Onteiening tot nou chaoties en uiters swak bestuur is. Dié politieke party ondersteun volhoubare en regverdige grondhervorming, maar is hoogs ontsteld oor die hantering van publieke verhore rakende die wetsontwerp.

Volgens mnr. Sydney Opperman, DA-LP en die party se woordvoerder vir publieke werke, was die proses vir die deelname van die publiek aan die wetsontwerp se ontwikkeling so swak geadverteer, en in sulke afgesonderde plekke gehou, dat selfs lede van die portefeuljekomitee vir publieke werke - wat die wetsontwerp verwerk - nie die verrigtinge kon bywoon nie.

Die komitee sou ook dié week vir verskeie vergaderings vir beraadslaging oor die voorgestelde wet byeengekom het, maar die vergaderings is sonder kennis afgestel. Die lede van die komitee is nie in kennis gestel nie en geen nuwe datums is vasgestel vir die vergaderings nie.

" 'n Voorwendsel"

Opperman sê dat die konsultasieproses vir die wetsontwerp 'n voorwendsel is en dat dit duidelik is dat die ANC beoog om die wetsontwerp deur die Parlement te jaag, ten spyte van die "massiewe teenstand wat die wetsontwerp van die publiek ontlok het".

Hy meen ook dat daar nie genoeg tyd opsy gesit is vir bydrae van die publiek nie. "Dit is besonder absurd dat wetgewing wat so krities is vir Suid-Afrika se sosio-ekonomiese toekoms slegs drie dae toegeken is vir oorweging."

Die DA sal 'n versoek aan die voorsitter van die portefeuljekomitee vir publieke werke rig om vas te stel waarom die geskeduleerde vergaderings is skielik afgestel is. Die party sal ook versoek dat die publieke konsultasie proses vir die wetsontwerp weer geloods word.

30 Julie 2008