Radikale veranderinge oor grond?

Plaasgrond. Foto: VOLKSBLAD

Die feit dat verskeie amptenare verskillende standpunte oor grondkwessies het, kan moontlik ‘n radikale verandering aandui, sê Agri SA.

“Hoe meer mense hieroor praat, hoe meer bevestig hulle dat ‘n radikale verandering moontlik kan kom wat beginsels hierrondom aanbeterf”, sê mnr. Hans van der Merwe, uitvoerende direkteur van Agri SA. Hy het gereageer op ‘n berig in Die Burger waarin ‘n staatsamptenaar wéér die versekering gee dat die nasionalisering van landbougrond nie op die kaarte is nie.

Luidens die berig Nuus24.com, het die departement gereageer op ‘n artikel wat mnr. Johannes Möller, die voorsitter van Agri SA, in dié koerant geskryf het. Volgens Möller gaan die bontpratery rondom dié kwessie die land duur te staan kom, veral ten opsigte van voedselsekuriteit, ‘n mededingende markomgewing en werksgeleenthede binne die sektor.

Nkwinti verander glo standpunt
Vroeër het mnr. Tozi Gwanya, die direkteur generaal van die Departement van Landelike Ontwikkeling en Grondhervorming, gesê in die departement se Groenskrif word die nasionalisering van landbougrond glo voorgestel. Kort daarna het mnr. Gugile Nkwinti, die Minister van die departement, in sy begrotingsrede gesê nasionalisering is nié op die kaarte nie.

Nkwinti het egter sy standpunt verander in ‘n onderhoud met eNews. Hy het boere toe glo gewaarsku om “saam te werk” om ’n “krisis, erger as Zimbabwe” te voorkom.

Jongste van die departement
Mnr. Mtobeli Mxotwa, senior mediabestuurder van die departement, het in reaksie op Möller se stelling in ’n verklaring gesê die departement het geen beleid van nasionalisering nie.

Hy het verduidelik dat die departement ’n mandaat het om post-koloniale herkonstruksie en ontwikkeling te verseker deur middel van ’n omvattende landelike ontwikkelingsprogram.

Volgens Mxotwa sal ’n Groenskrif oor die nuwe grondvoorstelle binnekort aan die Kabinet voorgelê word vir bespreking. “Die Groenskrif sal voorstel dat die huidige eiendomsregstelsel hersien en vervang moet word met ’n drievlak-verblyfregstelsel sodat Suid-Afrika gelyke toegang tot grond en volhoubare grondgebruik kan bereik.”

Van der Merwe meen ‘n duidelike mandaat oor grondkwessies is binne die departement nodig, “sodat die bontpratery kan stop en hulle uit een mond kan praat. Hoe meer verskillende amptenare hulleself oor die kwessie uitspreek, hoe meer verwarring skep hulle. Dit moet van een bron af kom!”

Volgens Van der Merwe hoop hy vir duidelikheid en rustigheid oor die kwessie.

Bron: Nuus24.com

1 April 2010