SA is op Zim-pad - CFU

Herfs, Tarkastad. Foto: THEUNS BOTHA

Suid-Afrika kan ‘n tweede Zimbabwe word, sê die Zimbabwe Commercial Farmers’ Union.

Dié unie se voorsitter, mnr. Deon Theron, sê dié unie is veral bekommerd oor die uitsprake deur mnr. Julius Malema, voorsitter van die ANC Jeugliga, ander plaaslike politici en die Regering se stilte daaroor.

Thereon het met landbou.com gesels tydens die jaarlikse kongres van die Suider-Afrikaanse Konfederasie van Landbou-unies (Sacau).

“Dís waar alles in Zimbabwe begin het. Daar was mense wat die hele tyd omstrede uitsprake gemaak het, en die regering het hulle nie gestop en hulself nie sterk daarteen uitgespreek nie. Die SA Regering het die geleentheid om uit Zimbabwe se foute te leer, maar dit lyk nie of hulle dit ter harte neem nie,” sê Theron.

Hy sê egter die feit dat die SA Regering steeds met boere gesels is ‘n pluspunt.

Sal sake moet heroorweeg
Theron meen dat die SA Regering baie sake sal moet heroorweeg om ‘n tweede Zimbabwe-situasie te keer. “Hy gaan van dit wat hulle sê en doen, moet heroorweeg en veral iets doen aan korrupsie. Ek het ook vrae oor die grond van onproduktiewe opkomende boere wat teruggevat word,” sê hy.

Volgens Theron loop frustrasie onder Zimbabwese boere hoog. Hy sê sowat 150 van die kommersiële boere het tans regsake teen hulle omdat hulle steeds op hul grond boer. “Daar is slegs sowat 300 kommersiële boere in die land oor, en die helfte van hulle word deur regsoptrede bedreig.”

Theron sê voordat dinge in Zimbabwe begin skeef loop het, het die land sowat 4 500 kommersiële boere gehad. Sowat 20 van dié boere het hulle lewens weens die geweld in die land verloor. “Baie van die boere het van hulle diere en besittings na hulle vriende se plase gevat en boer tans net oor naweke.

Theron sê hy is egter hoopvol dat die huidige situasie sal omdraai en dat die land weer sal groei. “As die politiek net kan stabiliseer en ons ‘n goeie regering aan bewind kan kry. Ons en só baie ander lande en instansies wag daarvoor.”

29 Maart 2010