’n Gees van optimisme het vanjaar op die United South African Agricultural Association (USAAA) se gala-geleentheid by die Agri Megaweek by Bredasdorp geheers. Dít het gevolg ná die USAAA en die African Farmers’ Association of South Africa (Afasa) aangekondig het dat dié twee organisasies vanaf 1 Oktober vanjaar af onder een sambreel gaan saamwerk.
 
Dié ooreenkoms fokus daarop om nuwe boere doelgerig op ’n kommersiële grondslag te vestig.
 
Mnr. Ralph Swart, ‘n skaap-, bees- en graanboer van Elim, is by die geleentheid as die USAAA se Kommersiële Boer van die Jaar vir 2012 aangewys. Ralph is die afgelope twee jaar lid van die organisasie en hy sy vrou, Trulene, en hulle seuns, Lian en Jacques, is reeds ’n paar jaar aktief in kommersiële boerdery betrokke.
 
Ander toekennings
Mnr. Tommy Langford, ’n kleinboer van Mamre, is by dieselfde geleentheid aangewys as die USAAA se Kleinboer van die Jaar. Langford is ’n vark- en blomboer, wat fokus op die kweek en bemarking van dahlias en snyblomme. Hy het onder mentorskap al ’n paar varkvoer-formules ontwikkel.

“Volgens die USAAA is hy inspirerend en moes hy al verskeie kere ná terugslae opstaan en bykans van vooraf begin,” lui ’n verklaring.
 
Mnr. Heinrich Dowry is as die USAAA se Jongboer van die Jaar bekroon.Volgens Dowry, wat ’n suksesvolle olyfboer is, leef hy al vandat hy 12 jaar oud is op ’n plaas, en sê hy is ’n boer “in murg en been.”