Dwelms ‘speel rol by plaasaanvalle’

Plaasmoorde. Foto: VERSKAF

“Om ‘n misdaad te pleeg het jy moed nodig, en baie aanvallers gebruik dwelms om daai moed te kry”. Dit is die mening van mnr. Lukas Swart, die skrywer van die boek, Oorwin Plaasaanvalle, oor hoekom sommige plaasmoorde en -aanvalle so brutaal is.

In twee onlangse plaasmoorde in die Vrystaat is die slagoffers wreed vermoor. Mnr. Koos van Zyl, en sy vrou, Rita, van die plaas Poortjie tussen Senekal en Steynsrus, is drie weke gelede vermoor. Van Zyl is doodgeskiet, en sy vrou is verskeie kere met ‘n skerp voorwerp - vermoedelik ‘n vleishak - gesteek en geskiet.

Die afgelope naweek is ‘n boer van Ficksburg, mnr. Ernest Giefeke,  van die plaas Goodhope dood nadat hy met ‘n klip teen sy kop gekap en sy keel met ‘n mes gesny is.

Verskillende mengsels
Volgens Swart het baie aanvallers voorheen ‘n mengsel van dagga en mandrax gerook sodat hulle genoeg moed sou hê om hul slagoffers aan te val. Hy sê die Chinese Mafia het die afgelope tyd egter groot hoeveelhede opium die land ingebring, en misdadigers gebruik deesdae eerder ‘n mengsel van dagga en opium.

Swart sê mense wat ‘n mengsel van dagga en mandrax gebruik, kan tot ‘n mate nog deur hulle slagoffers afgeskrik word. Die mengsel van dagga en opium het egter ‘n sterker invloed op die gebruiker, wat dan glad nie afgeskrik word nie. Dit lei dikwels tot wreder aanvalle.

Swart sê volgens statistieke word slegs 4% van aanvalle veroorsaak deur haat vir die slagoffer. “Meeste van die aanvallers sien dit net as ‘n saketransaksie, en sommige gebruik rassistiese aanmerkings om die slagoffers bang te maak. Hy sê 17% van aanvalle loop op ‘n moord uit omdat dit verkeerd gehanteer word, en 88% van aanvalle word beplan deur mense wat naby aan die slagoffers is.”

Hoe om op te tree tydens ‘n aanval
“Moenie dat jou aanvaller enigsins vrees by jou opmerk nie, bly kalm en rustig”. Swart sê baie boere tree tydens ‘n plaasaanval op een van drie maniere op: Van hulle neem ‘n houding in dat hulle jammer is dat hulle blankes is, en dit gee die aanvaller ‘n gevoel van mag. Sommige laat die aanvaller verstaan dat hulle jammer is dat hulle in die land is, en dit lei ook tot ‘n gevoel van mag. ‘n Derde groep, veral vroue, skrik en skree uit vrees op die aanvallers, totdat die aanvallers breekpunt bereik en beheer verloor.

Hy raai boere aan om twee goed te onthou tydens ‘n aanval. “Moenie eerste ‘n wapen rig nie: Sodra hulle sien jy het ‘n wapen, gaan hulle op jou skiet sonder om vrae te vra. Bly koel en kalm, jy weet mos waarvoor hulle daar is. Wys alle items waarna hulle soek vir hulle uit. As die gemeenskap gemoboliseer is, kan jy jou besittings selfs binne ses ure terug hê”.

Is buitelanders betrokke?
Volgens Swart is buitelanders nie baie by sulke aanvalle betrokke nie. Hy sê in die Brits-area is daar ‘n redelike betrokkenheid van buitelanders, maar dis ‘n klein persentasie.

Swart raai alle boere aan om deel te word van enige gemeenskapstruktuur vir veiligheid in hul omgewing. Hy sê sodoende kan die gemeenskap tydens ‘n aanval gemobiliseer word en die verdagtes word vinniger vasgesterk, of ‘n aanval kan voorkom word. Hy het ook al twee maatskappye gestig waarvan boere kan deel word. Hulle is: Swartland Intelligence Support Services en Afrika Kriminele en Sosiale Kode Analiste.

Swart sê tans kom die meeste plaasaanvalle in die distrikte van Kameeldrift, Cullinan, Bronkhorstspruit en Babsfontein voor. Hy meen plaasaanvalle het sedert 2000 afgeneem, want volgens sy statistieke het daar toe ses aanvalle per dag plaasgevind.

Mnr. André Botha, die voorsitter van AgriSA se veiligheidskomitee, het onlangs aan Landbou.com gesê volgens hulle statistieke vind daar tans twee plaasinsidente per dag en twee plaasmoorde per week plaas.

Lees ook:
Plaasaanvalle (1): Regte boodskap skrik skurke af

Boere te galate, onbetrokke

26 Januarie 2010