Hofsaak oor Lesotho-grens

Vrystaat Landbou sleep die Regering nou hof toe om sy verpligting teenoor die veiligheid van die landbougemeenskap aan die Lesotho-grens na te kom.

Vrystaat Landbou se regspan het die daad by die woord gevoeg en gister sy aansoek by die Hooggeregshof in Bloemfontein ingedien om die Regering te verplig om veral die landbougemeenskap se veiligheid aan die Lesotho-grens te verseker.

Altesaam 14 verweerders is genoem.

Die regspan is deur adv. George Bizos gelei en deur mnr. Jan Smit van Naude's Prokureurs verteenwoordig. Die aansoek beslaan meer as 800 bladsye oor die krisis aan die Lesotho-grens, waar boere al jare lank onder misdaad deurloop.

Mnr. Louw Steytler, voorsitter van Vrystaat Landbou, het gesê dis 'n dag waar reg en geregtigheid sal plaasvind. "Vrystaat Landbou verdedig met trots, nie net die boere langs die Lesotho-grens se konstitusionele reg om deur die staat deur misdaad beskerm te word nie, maar ook indirek elke burger van die land se reg in dié verband", sê hy.

As die aansoek suksesvol is sal die staat onder meer die grensheining tussen Suid-Afrika en Lesotho in stand moet hou en patrollies moet doen. Eise vir skadevoergoeding sal ook kan volg.

Die verweerders is:

• President van Suid-Afrika

• Minister van Veiligheid en Sekuriteit

• Minister van Verdediging

• Minister van Binnelandse Sake

• Premier van die Vrystaat

• LUR vir veiligheid en sekuriteit vir die Vrystaat

• Nasionale kommissaris van die SAPD

• Provinsiale kommissaris van die SAPD

• Minister van Landbou en Grondsake

• Minister van openbare werke

• LUR vir landbou en grondsake

• LUR vir penbare werke, paaie en vervoer

• Minister van Buitelandse Sake

• Minister van Finansies.

8 April 2009