'Veiligheidskrisis lê by Grondewet'

Suid-Afrika se veiligheidsprobleem is nie 'n tekort aan polisiemanne nie. Die probleem lê voor die deur van die Grondwet, het dr. Jan du Plessis, bekende toekomsanalis op die TLU SA se konferensie oor veiligheid in Pretoria gesê.

"Die Grondwet skep 'n dualisme met die verpligting om 'n veilige omgewing vir burgers te skep en andersyds ongelykhede in die verlede reg te stel met breë bevolkingsverteenwoordiging".

"Die politieke profiel van die polisie is nie gebaseer op vermoë nie, maar op rassesamestelling ingevolge die Grondwet. Dit beteken die mense is daar, maar kundigheid ontbreek om die werk te doen."

Hy voorspel dat die veiligheidsituasie in die land nie gaan verbeter nie, maar 'n groter probleem gaan word. "Dit is die harde werklikheid wat mense in hul toekomsbeplanning in ag moet neem."

Volgens mnr. Henri Boshoff van die Instituut vir Sekerheidstudies beperk die veiligheidswette mense om op te tree. Hy sê die grootste groep vuurwapeneienaars is in die selfverdedigingsveld en daar is geen vereniging wat dié groep verteenwoordig nie.

Hy meen beveiliging gaan in die toekoms 'n al hoe groter hap uit mense se inkomste neem, hoewel daar geen veiligheidswaarborge is nie.

Boshoff sê daar is geen verskil meer tussen plaasaanvalle en wat nou in stede en dorpe gebeur nie.

"Gemeenskappe moet deur die gemeenskapspolisiëringsforums (GPF) druk op die SA Polisiediens plaas om sy plig na te kom. Hulle met deur die GPF klagte lê as dit nie gebeur nie."

Hy sê landelike beveiliging het om die kommando's gedraai en sektorpolisiëring sal nooit werk as mense wat dit moet uitvoer, blankes nie goedgesind is nie.

Landbouweekblad, 2 Maart 2007