Suid-Afrika se sybokhaarmark sal aan die wêreld bekend gestel word tydens die Vogue Knitting Live-ekspokompetisie wat van 26 tot 28 Oktober vanjaar in Chicago aangebied word.

Sybokhaar Suid-Afrika (SSA) is onlangs as die hoofborg van dié geleentheid aangewys.
 
Duisende brei- en hekelgeesdriftiges het al op vorige ekspo’s wat in Los Angeles en New York gehou is, toegesak. Die ekspo fokus op mode, vesel en opvoeding rakende sybokhaar, en dit word as enig in sy soort beskryf.
 
Die ekspo is die breinkind van die Vogue Knitting-tydskrif. Sowat 200 breiklasse, 10 modevertonings en ’n breiwerkgallery sal deel uitmaak van die ekspo.
 
Nuwe gier
Me. Trisha Malcolm, redakteur van Vogue Knitting, sê volgens hul jongste inligting het die gebruik van sybokhaargare toegeneem. Dit kan aan ’n toename in verkope gesien word. Sy sê ’n maatskappywoordvoerder het dié toename aan die Mohair/Vogue Knitting-kompetisie toegeskryf.
 
“Sybokhaar raak ook vinnig die gare van keuse vir uitbeeldende en innoverende ontwerpe, en met die toename in die gewildheid van brei, kan ons nie meer in ons skik wees dat Sybokhaar SA ons hoofborg is nie,” vertel Malcolm.
 
Me. Lindsay Humphreys, SSA se bemarkingskoördineerder, sê hulle fokus op vennootskappe wat die verbruik van sybokhaar sal verbeter, en derhalwe sal lei tot ’n volhoubare vraag na die vesel en winsgewendheid van die bedryf.
 
Die ekspo sal die plaaslike bedryf aan Vogue Knitting se lesersgetal van sowat 206 000 bekend stel, asook aan sy webtuiste en sosiale netwerke.